أشهر إشاعتين عن توفيق الدقن في ذكرى وفاته

في ذكري وفاة توفيق الدقن الثلاثين نحب نتكلم علي حجتين منتشرين عن الدقن و محصلوش و حاجات كتير حصلت معاه و منتشرتش .

أول شيء منتشر

و هو محصلش أن توفيق الدقن راح للعقاد بعد فيلم الرسالة و قالة مدتنيش دور ليه قاله لأنك بتعمل أدوار شر فقاله طيب كنت خدني مع الكفار ، الحدثة دي مختلقه و محصلتش و من وحي خيال السوشيال ميديا ، الدقن كان صاحب كرامة لدرجة أنه في بدايته اتخانق مع الريحاني عشان اتريق علي اسمه .

ثاني حادثه

أن أمه ماتت لما شافته بيعمل ادوار شر و افتكرت انه فعلا زي الأفلام القصه دي برضه هجص و محصلتش و من الخيال ، أم الدقن كانت الداعم الاول ليه فنيا و كانت دعوتها ليه ديما انها تشوفه زي محمود المليجي .

الدقن و المليجي بالنسبة ليا هم اهم مواهب مصر الفنية الي ظهرت مع زكي رستم و احمد زكي و محمود عبد العزيز ، الدقن الزملكاوي لعيب الكرة الحريف الي كان بيلعب في نادي المنيا و هو شاب و جاب جول في الزمالك الي كان وقتها فاروق الأول و الزمالك طلبه و الدقن فرح انه ح يلعب في النادي الي بيشجعه بس لما عرف أنه بيحلقوا للشباب هناك شعرهم رفض لأنه كان عايق و بيحب شعره !

الدقن الي لما راح يقدم في معهد السينما و هو موظف في السكة الحديد مع صحبه سعد أردش كانت اللجنة فيها الريحاني و طليمات ، الريحاني قاله ايه دقن ده هو ده إسم فرد عليه الدقن وقاله و إيه الريحاني ده ، الريحاني اتعصب و قاله أنت جاي تقل أدبك و انا شفتك بتعاكس البنات بره و طرده ، بس طليمات عجبه رده علي الريحاني و كلمه و دخله معهد السينما رغم رفض الريحاني .

و بداء يشتغل و هو طالب في المعهد و اكتشفه في المسرح مدبولي لما جابه في مسرحية الناس الي تحت و بعدها عجب فريد شوقي الي قاله أنا محدش ساعدني أني أمثل إلا انور وجدي هو الي وقف جنبي و انا ح اقف جنبك زي ما انور وجدي وقف جنبي و فعلا فريد شوقي جابه معاه في ٣ أفلام ورا بعض كانوا هما انطلاقة الدقن و هي " سلطان و الفتوة و بورسعيد " و بعدها انطلق الدقن .

الدقن صاحب الأيفهات الأشهر الي كلها كانت من دماغه ، مشهد المخرج يقوله رد علي التليفون و قول ألو ، فيرد الدقن و يقول ألو يا أمم و تبقي أشهر افيه في الفيلم ، او يطلب منه يقول الصلاة علي الصلاة فيقول صلاة النبي احسن بأسلوبه و تبقي هي تيمه فيلم إبن حميدو ، و احلي من الشرف مفيش و لما لوحده يقول في علي باب الوزير انا راجل لعين يا أخي .

أخرهم كانت في فيلم الشيطان يعظ مشهد مطلوب منه يقول ح نتقابل في أرض محايدة فهو يضيف من عنده في الأخر كلمة سويسرا ، و بعدها أشرف فهمي طلب منه يقول " هي الدنيا فيها ايه ، الناس كلها بقيت فتوات ؟ " لكن الدقن قال " الناس كلها بقت فتوات.. أمال مين اللى هيضرب؟ " عشان كل اللوكيشن يضحك و أشرف فهمي يغير نهاية الفيلم بحيث أن الجملة دي تكون هي النهاية !

الدقن قبل ما يموت بيوم قال لابنه وديني شبرا ازور اخواتي و هو راجع قاله انا حاسس أني ح أموت ، و سكت شوية و قاله " يلا في ستين داهية " بصوتة و أسلوبه المميز و ضحك ، تاني يوم بتدهور صحة توفيق و بيموت في المستشفي عن عمر ٦٥ سنة و بتخسر السينما المصرية علامة فارقة و موهبة من أعظم المواهب الي شوفتها أنا في السينما بره و جوه مصر .

***********************

آخر الأخبار

أشهر إشاعتين عن توفيق الدقن في ذكرى وفاته





أشهر إشاعتين عن توفيق الدقن في ذكرى وفاته